ରାସ୍ତା ସମସ୍ୟା ଶୁଣିଲାନି ପ୍ରଶାସନ, ଓଡିଶା ଆନ୍ଧ୍ର ରାସ୍ତା ଅବରୋଧ  

ରାସ୍ତା ସମସ୍ୟା ଶୁଣିଲାନି ପ୍ରଶାସନ, ଓଡିଶା ଆନ୍ଧ୍ର ରାସ୍ତା ଅବରୋଧ

ରାୟଗଡା: ଦୀର୍ଘ ବର୍ଷ ହେଲା ରାସ୍ତା ପାଇଁ ଦାବି କରୁଥିଲେ ଓଡିଶା ଆନ୍ଧ୍ରପ୍ରଦେଶର ସୀମାନ୍ତ ବାସିନ୍ଦା । କିନ୍ତୁ ପ୍ରଶାସନ ଶୁଣିଲାନି । ଚେତାବନୀ ମଧ୍ୟ ଦେଇଥଲେ ରାସ୍ତା ଅବରୋଧ ପାଇଁ । ପ୍ରଶାସନ ଗ୍ରାମବାସୀଙ୍କ ସହ ଆଲୋଚନା କରି ରାସ୍ତା ସମସ୍ୟାର ସମାଧାନର ବାଟ ବାହାର କଲାନାହିଁ । ଆଜି ଓଡିଶା ସୀମାନ୍ତ କେରଡା ଗ୍ରାମ ପଞ୍ଚାୟତର ଶତାଧିକ ଗ୍ରାମ ବାସିନ୍ଦା ପ୍ରଶାସନିକ ଉଦାସୀନତାକୁ ବି‌ରୋଧ କରିବା ସହ ଆଜି ସୀମାନ୍ତ ରାସ୍ତାକୁ ଅବରୋଧ କରିଛନ୍ତି । ଫଳରେ କେରଡା ରାସ୍ତା ଦେଇ ସୀମାନ୍ତ ଅଞ୍ଚଳରେ ଯାତାୟତ ବାଧାପ୍ରାପ୍ତ ହୋଇଛି । ସୀମାନ୍ତ କେରଡା ପଞ୍ଚାୟତର ଗ୍ରାମବାସୀ ମାନେ ଅନିଜା ଗ୍ରାମ, ଏମ୍ପଲବାଲାସା ଗ୍ରାମ ଠାରୁ ଆନ୍ଧ୍ର ସୀମା ଯାଏଁ ପିଚୁରାସ୍ତା ଓ ଅନିଜାଠାରୁ ଇସ୍କାପାଲମ(ବୋର ହାଲୁଆ) ପର୍ଯ୍ୟନ୍ତ ପିଚୁ ରାସ୍ତା ନିର୍ମାଣ ଦାବି କରି ଗ୍ରାମବାସୀମାନେ ରାସ୍ତା ଅବରୋଧ କରିଛନ୍ତି । ପ୍ରଶାସନ ଯଦି ରାସ୍ତା ନିର୍ମାଣ ପାଇଁ ପଦକ୍ଷେପ ଗ୍ରହଣ ନକରେ ତେବେ ତେବେ ଅବରୋଧ ଏବଂ ଆନ୍ଦୋଳନ ଜାରି ରହିବ ବୋଲି ଗ୍ରାମବାସୀ ମାନେ ଚେତାବନୀ ଦେଇଛନ୍ତି । ରାସ୍ତା ଅବରୋଧ କରିବା ପରେ ଶେଷଖାଲ ଥାନା ଅଞ୍ଚଳର ପୁଲିସ ଟିମ ରାସ୍ତା ଅବରୋଧ ସ୍ଥଳରେ ପହଁଚି ଗ୍ରାମବାସୀଙ୍କ ସହ ଆଲୋଚନା କରୁଛନ୍ତି । କିନ୍ତୁ ଦାବି ପୁରଣ ପାଇଁ ଠୋସ ପଦ‌କ୍ଷେପ ଗ୍ରହଣ କରାନଗଲେ ରାସ୍ତା ଅବରୋଧ ହଟିବ ନାହିଁ ବୋଲି ଗ୍ରାମବାସୀମାନେ ସ୍ପଷ୍ଟ କରିଛନ୍ତି । ଏମ୍ପଲବାଲାସା ଗ୍ରାମର ଜ୍ୟୋତି କିଲାକା ଅଭିଯୋଗ କରି କହିଛନ୍ତି ବେସରକାରୀ ରିସୋର୍ଟକୁ ରାସ୍ତା ପାଇଁ ପ୍ରଶାସନ କୋଟି କୋଟି ଟଙ୍କା ଖର୍ଚ୍ଚ କରୁଛି, କିନ୍ତୁ ଆମ ଗ୍ରାମର ମୌଳିକ ଦାବିକୁ କାହିଁକି ଶୁଣୁନି । ପ୍ରଶାସନ ସାଧାରଣ ଲୋକ ପାଇଁ ନା ବେପାରୀଙ୍କ ପାଇଁ ବୋଲି ପ୍ରଶ୍ନ କରିଛନ୍ତି ଜ୍ୟୋତି କିଲାକା ।ସୂଚନାରୁ ଜଣାପଡିଛି ଆନ୍ଧ୍ର ପ୍ରଦେଶ ସୀମାନ୍ତ ଅଞ୍ଚଳର ଓଡିଶାର ଗ୍ରାମଗୁଡିକ ପାଇଁ ଦୀର୍ଘ ବର୍ଷ ହେଲା ରାସ୍ତା ନିର୍ମାଣ କରାଯାଉନି । ମାତ୍ର ୩କିମି ସୀମାନ୍ତ ଅଞ୍ଚଳ ରାସ୍ତା ଓ ମୌଳିକ ସୁବିଧା ଯୋଗାଇଦେବାକୁ ଯଦି ସରକାର ଓ ପ୍ରଶାସନ ତତ୍ପରତା ପ୍ରକାଶ କରୁନାହାନ୍ତି ତେବେ ଓଡିଶା ଲୋକ କାହିଁକି ଆନ୍ଧ୍ରପ୍ରଦେଶକୁ ସମର୍ଥନ କରିବେ ନାହିଁ ବୋଲି କିଶୋର ଜିଲାକାରା କହିଛନ୍ତି । ୬ମାସ ତଳେ ଏହି ରାସ୍ତାକୁ ଓଡ଼ିଶା ନିର୍ମାଣ କରୁନଥିବାରୁ ଆନ୍ଧ୍ରପ୍ରଦେଶ ନିର୍ମାଣ କରୁଥିଲା | କିନ୍ତୁ କୌଣସି ସୂତ୍ରରୁ ଖବର ପାଇ ରାୟଗଡା ତହସିଲଦାର ପ୍ରିୟଦର୍ଶନୀ ସ୍ବାଇଁ ଘଟଣାସ୍ଥଳକୁ ଯାଇ ନିର୍ମାଣ କାର୍ଯ୍ୟ ବନ୍ଦ କରିବାକୁ ତାଗିଦ କରିଥିଲେ ଓ ରାସ୍ତା ବନ୍ଦ ହୋଇଥିଲା ।ଏହାପରେ ପ୍ରଶାସନ ଖୁବ ଶୀଘ୍ର ରାସ୍ତା ନିର୍ମାଣ ହେବ ବୋଲି ପ୍ରତିଶୃତି ମଧ୍ୟ ଦେଇଥିଲେ । କିନ୍ତୁ ଘଟଣାର ୬ମାସ ବିତିଯାଇଥିଲେ ମଧ୍ୟ ରାସ୍ତା ନିର୍ମାଣ ପାଇଁ ପ୍ରଶାସନ ତରଫରୁ କୌଣସି ପଦକ୍ଷେପ ଗ୍ରହଣ କରାଯାଇନଥିଲା । ଏନେଇ ଗ୍ରାମବାସୀମାନେ ନିକଟରେ ମେ ମାସ ଏବଂ ଅକ୍ଟୋବର ମାସରେ ଜିଲ୍ଲାପାଳଙ୍କୁ ଲିଖିତ ଭାବରେ ଅବଗତ କରିଥିଲେ । ଅବରୋଧସ୍ଥଳରେ କେରଡା ସରପଞ୍ଚ ବିଜୟଲକ୍ଷ୍ମୀ କଲକା, ପୂର୍ବତନ ସରପଞ୍ଚ ମିନାରାଓ ହିମିରିକା, ବଳରାମ ଜିଲାକାର ଓ ଅନ୍ୟମାନେ ଉପସ୍ଥିତ ରହିଛନ୍ତି । ରାସ୍ତା ଅବରୋଧ ହୋଇ ଏକ ଘଣ୍ଟାରୁ ଉର୍ଧ୍ବ ସମୟ ହୋଇଥିଲେ ମଧ୍ୟ ପ୍ରଶାସନର କେହି ଅଧିକାରୀ ଆଲୋଚନା ନିମନ୍ତେ ପହଁଚି ନଥିବା ଜଣାପଡିଛି ।