ବୈତରଣୀରେ ପୁଣି ସକ୍ରିୟ ବେଆଇନ ବାଲି ଖନନ ଓ ଚାଲାଣ: ୧୦ଟି ବାଲି ବୋଝେଇ ହାଇୱା ଜବତ, ୪ ଚାଳକ ଅଟକ

 ବୈତରଣୀରେ ପୁଣି ସକ୍ରିୟ ବେଆଇନ ବାଲି ଖନନ ଓ ଚାଲାଣ: ୧୦ଟି ବାଲି ବୋଝେଇ ହାଇୱା ଜବତ, ୪ ଚାଳକ ଅଟକ

ହାଟଡିହି :  ବୈତରଣୀ ନଦୀରୁ ପୁଣି ଆରମ୍ଭ ହୋଇଛି ବାଲିର ବେଆଇନ ଖନନ ଓ ଚାଲାଣ। ଅକ୍ଟୋବର ୧୫ ତାରିଖ ପରେ ବାଲି ଘାଟଗୁଡ଼ିକ ଖୋଲିବା ପରଠାରୁ ନଦୀରୁ ବାଲି ଉଠାଣ ଓ ପରିବହନ ବୃଦ୍ଧି ପାଇଛି। ତେବେ ଅନୁମୋଦିତ ଘାଟ ବ୍ୟତୀତ କେତେକ ବେଆଇନ ଘାଟରୁ ମଧ୍ୟ ବାଲି ଉଠାଯାଉଥିବା ଏବଂ ବିନା ଆବଶ୍ୟକୀୟ କାଗଜପତ୍ରରେ ହାଇୱା ଯୋଗେ ଦୂରଦୂରାନ୍ତକୁ ପରିବହନ କରାଯାଉଥିବା ଅଭିଯୋଗ ପରେ ପୁଲିସ ଓ ପ୍ରଶାସନର ମିଳିତ ଚଢ଼ାଉରେ ୧୦ଟି ହାଇୱା ଜବତ ହୋଇଛ ଓ ୪ଜଣଙ୍କୁ ଗିରଫ କରାଯାଇଛି। ବାଲି ଚୋରା କାରବାର ସମ୍ପର୍କରେ ଅଭିଯୋଗ ଓ ସୂଚନା ପାଇବା ପରେ ଗତକାଲି ରାତିରେ ପ୍ରଶାସନ ଓ ପୁଲିସ ପକ୍ଷରୁ ଏକ ମିଳିତ ଚଢ଼ାଉ କରାଯାଇଥିଲା। ଏଥିରେ ଆନନ୍ଦପୁର ଉପଜିଲ୍ଲାପାଳ ନୀଳମାଧବ ସୁନା, ଏସଡିପିଓ କମଳ କୁମାର ପଣ୍ଡା, ହାଟଡିହି ତହସିଲଦାର ସଞ୍ଜୟ ସାମନ୍ତରାୟ, କେନ୍ଦୁଝର ଖଣି ବିଭାଗର ଅଧିକାରୀ ଏବଂ ନନ୍ଦିପଦା ପୁଲିସ ସାମିଲ ହୋଇଥିଲେ। ମିଳିତ ଟିମ୍ ଅଣା-ସମଣା ରାସ୍ତାର ବିଭିନ୍ନ ସ୍ଥାନରେ ଯାଞ୍ଚ କରିବା ସହ ବାଲି ବୋଝେଇ ହୋଇ ଯାଉଥିବା ୧୦ଟି ହାଇୱାକୁ ଅଟକାଇ ଜବତ କରିଥିଲେ। ଏହି ଚଢ଼ାଉ ସମୟରେ ବେଆଇନ ବାଲି ପରିବହନରେ ସମ୍ପୃକ୍ତ ଗାଡ଼ିଗୁଡ଼ିକୁ ଧରିବାରେ ପ୍ରଶାସନ ସଫଳ ହୋଇଥିବା ବେଳେ ଅନ୍ୟ କେତେକ ଗାଡ଼ି ଚାଳକ ଧରାପଡ଼ିବା ଭୟରେ ରାସ୍ତା ଉପରେ ବାଲି ଢାଳି ଦେଇ ଘଟଣାସ୍ଥଳରୁ ଫେରାର ହୋଇଯାଇଥିବା ଜଣାପଡ଼ିଛି। ରାସ୍ତା ଉପରେ ବାଲି ଢାଳି ଗାଡ଼ି ଚାଳକମାନେ ଫେରାର ହୋଇଯିବା ଫଳରେ ଅଣା-ସମଣା ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଥିଲା। ଏହି ଘଟଣାକୁ ନେଇ ନନ୍ଦିପଦା ଥାନାରେ ୪୦୧ରୁ ୪୧୦ ପର୍ଯ୍ୟନ୍ତ ମୋଟ ୧୦ଟି ମାମଲା ରୁଜୁ ହୋଇଛି। ଏଥିସହ ୪ ଜଣ ଗାଡ଼ି ଚାଳକଙ୍କୁ ପୁଲିସ ଅଟକ ରଖି ଘଟଣାର ଅଧିକ ତଦନ୍ତ ଜାରି ରଖିଛି।